ရဟန်းတော်များနှင့် အင်တာနက်

March 21, 2014 at 10:08pm

ယနေ့ခေတ်မှာ ရဟန်းတော်တွေ အင်တာနက်သုံးတာနဲ့ပတ်သက်ပြီးတော့ အင်တာနက်သုံးသူတွေကြားမှာ သုံးသင့်,မသုံးသင့်ဆိုတဲ့ သံသယစိတ်တွေ ပြန့်နှံ့နေကြတယ်…။ ဒီအကြောင်းအရာကို ဖြေရှင်းချက်ဘလော့ဂ်ရေးတင်ပေးဖို့ ခဏခဏတိုက်တွန်းကြတဲ့အတွက် မိမိ၏အမြင်ကို တင်ပြလိုက်ရပါသည်။

လွန်ခဲ့တဲ့နှစ်ပေါင်း 2500-ကျော် မြတ်ဗုဒ္ဓလက်ထက်တော်အခါတုန်းက အင်တာနက်ဆိုတာမရှိခဲ့တဲ့အတွက် ဒီအင်တာနက်နဲ့ပတ်သတ်ပြီး တိုက်ရိုက် ပညတ်ထားတဲ့သိက္ခာပုဒ်တော့မရှိပါဘူး…။ ဒါပေမယ့် တနည်းတဖုံအားဖြင့် သက်ဆိုင်တဲ့ သိက္ခာပုဒ်တွေတော့ရှိပါတယ်….။

သို့သော်လည်း ဒီအင်တာနက်သုံးခြင်းဟာ ကြီးမားတဲ့အပြစ်တော့မဟုတ်ဘူး။ နောက်တစ်ခုက ဘယ်အရာမဆို ခံယူတတ်သူပေါ်မှာပဲ မူတည်ပါတယ်….။ အင်တာနက်မှာ ဂျီတော့ပ်-တစ်ခုတည်းရှိတာမဟုတ်ပါဘူး။ အခြား ဗဟုသုတရစရာ အသိပညာ,အတတ်ပညာပိုင်းဆိုင်ရာ ၀က်ဆိုဒ်တွေလည်း အမြောက်အများရှိပါတယ်…။ အကျိုးရှိစွာအသုံးချမယ်ဆိုရင် ပြင်ပဗဟုသုတများ ရရှိနိုင်သည့်အပြင် ပညာရေးအတွက်လည်း များစွာအထောက်အကူပြုပါတယ်…။

ပူတဲ့ခွက်ထဲ ထည့်လိုက်တဲ့ရေဟာ ပူမယ်၊ အေးတဲ့ခွက်ထဲကို ထည့်လိုက်တဲ့ရေဟာ အေးမယ်၊ အဲဒီလိုပဲ ကောင်းတဲ့ဘက်မှာ အသုံးချလိုတဲ့အတွက်သုံးရင် ကောင်းပါတယ်။ တကယ်လို့ မကောင်းတဲ့ဘက်မှာ အသုံးချရင်တော့ အသုံးချတဲ့သူရဲ့ တစ်ကိုယ်ရည်အပြစ်ပဲ ဖြစ်ပါတယ်။ သိတဲ့အတိုင်း လူအမျိုးမျိုး စိတ်အထွေထွေ-ဆိုတဲ့ စကားပုံအတိုင်း ဆွမ်းဆန်ချောထဲ ကြက်ချေးရောတာမျိုးလည်း ပါလာနိုင်တယ်….။ ဒီနှစ်ခုကို တန်းတူသက်မှတ်ပြီး ရဟန်းတော်တွေ အင်တာနက်မသုံးရဘူးလို့ တသမတ်တည်း ယူဆမိရင် အမြင်မှန်မဖြစ်နိုင်ပါဘူး….။

မြန်မာနိုင်ငံမှာရှိတဲ့ ဗုဒ္ဓဘာသာဝင်တွေဟာ ရဟန်းတော်တွေရဲ့ အဆုံးအမအောက်မှာ တည်ရှိနေကြပါတယ်။ အဲဒီလို သူများကိုဆုံးမသွန်သင်နေတဲ့ရဟန်းတော်တွေဟာ အဆုံးမ ခံ ပုဂ္ဂိုလ်တွေထက်တော့ အသိဥာဏ်ဗဟုသုတပြည့်စုံသင့်ပါတယ်။

ရဟန်းတော်တွေအင်တာနက်သုံးခြင်းဟာ ခေတ်မှီတာပါ။ ခေတ်ဆန်တာမဟုတ်ပါဘူး၊ ဒါကိုလည်း ခွဲခြားသိတတ်ရပါမယ်။ ခေတ်မှီတာနဲ့ခေတ်ဆန်တာဟာ အင်္ဂလိပ်ဝေါဟာရမှာ သိပ်မသဲကွဲပေမယ့် မြန်မာ့မူရင်းစကားစစ်စစ်ကနေ ကြည့်လိုက်မယ်ဆိုရင် အလွန်ကိုပဲ ကွဲပြားခြားနားပါတယ်…။

ကိုရီးယားဇာတ်လမ်းတွဲတွေ မြန်မာနိုင်ငံကို ၀င်ရောက်လာပြီးနောက်မှာ မြန်မာမိန်းကလေးတွေရဲ့ဝတ်စားဆင်ယဉ်မှုတွေ ကာမဘက်ဦးစားပေးလာတာမျိုး များလာတာတွေ့ရမယ်။ ဒါ့အပြင် ကိုယ့်ကိုယ်ကို တန်ဖိုးထားမှုတွေလည်း လျော့ပါးလာပြီး သရုပ်ပျက်မှုတွေဖောင်းပွလာတာကိုလည်း ဘုရားပတ်ဝန်းကျင် တော်တော်များများနဲ့ ပန်းခြံတော်တော်များများမှာ တွေ့ရပါလိမ့်မယ်…။ ဒါဟာ ခေတ်ဆန်တာပါ ခေတ်မှီတာမဟုတ်ပါဘူး….။

လူတွေရဲ့အ၀တ်အစားခေတ်ဆန်မှုနဲ့ ရဟန်းတော်တွေရဲ့အင်တာနက်သုံးခြင်း ခေတ်မှီမှုကို တန်းတူးသက်မှတ်လို့မရပါဘူး။ ရဟန်းတော်တွေအင်တာနက်သုံးတာဟာ ဗဟုသုတနဲ့နည်းပညာပေါ် သိချင်မှု, အဲဒီကမှတဆင့် တရားတော်တွေကို တက်အားသလောက် ဖြန့်ဝေလိုမှုတွေ အများကြီးပါပါတယ်…။ လူတွေအနေနဲ့လည်း ကွန်ပြူတာရှေ့မှာအလုပ်လုပ်ရင်းရဟန်းတော်တွေနဲ့ တရားတော်တွေကို ဆွေးနွေးခွင့်ရတာဟာ ရဟန်းတော်တွေ အင်တာနက်သုံးတာကြောင့်ပါပဲ….။

ဆရာဝန်တွေဟာ ဆေးဖော်တော့မယ်ဆိုရင် ကမ္ဘာပေါ်မှာရှိသမျှသော အသီးအပွင့်တွေကို လက်လှမ်းမှီသလောက် စမ်းသက်ကြရပါတယ်….။ အဲဒီကမှ ရောဂါနဲ့သက်ဆိုင်တဲ့ ဆေးဖက်ဝင်တဲ့ အသီးအပွင့်တွေရဲ့ အနှစ်သာရတွေကိုထုတ်ယူပြီး ကျန်တာတွေကို လွှင့်ပစ်လိုက်ကြပါတယ်…။

ဒီသဘောတရားအတိုင်းပါပဲ…. အင်တာနက်ကနေ အကျိုးရှိတဲ့အရာတွေကို ထုတ်ယူပြီးတော့ အခြားသုံးစွဲသူတွေကိုလည်း အကျိုးရှိစွာအသုံးချဖို့ လမ်းညွှန်ပေးကာ အကျိုးမရှိတာတွေကို ဥပေက္ခာပြု ဖယ်ထုတ်လိုက်ရပါမယ်..။ သာမန်109/110-တွေ သုံးသလိုမျိုး ….ဘယ်သူလဲ…ဘယ်ကလဲ…
ပြောတာမျိုးအဆင့်လောက်နဲ့ပဲ လည်ပတ်နေမယ်ဆိုရင်တော့ အဲဒီလို သုံးစွဲတဲ့ရဟန်းတော်အပေါ်မှာပဲ မူတည်ပါတယ်…။ အကျိုးမဲ့ရှင်သန်နေသူ အနည်းစုကိုကြည့်ပြီး အကျိုးရှိစွာလျှောက်လှမ်းနေတဲ့အများစုကို အမြင်မမှားမိဖို့ လိုပါတယ်….။

ဦးဇင်းတို့ အင်တာနက်စသုံးတုန်းက အင်တာနက်သုံးခြင်းကို ပါရာဇိက-ကျတဲ့အပြစ်မျိုးလို သဘောထားပြီး အပြင်းအထန် ဝေဘန်သူတွေရှိခဲ့ဖူးတယ်။ အခုထိလည်း ကြုံတွေ့နေရတုန်းပဲ။ "ဘုန်းကြီးက တရားအလုပ်မလုပ်ဘဲ ဘာဖြစ်လို့ လိုင်းပေါ်တက်နေတာလဲ...? အလုပ်မရှိဘူးလား...?"စတဲ့ စကားလုံးတွေနဲ့ ပစ်ပေါက်ခံနေရတုန်းလေ..။

ဦးဇင်းတို့ လက်ရှိအင်တာနက်သုံးတယ်ဆိုတာ-က တရားတော်တွေကို လူတွေဆီ ပို့ပေးဖို့သက်သက်ပဲ ဖြစ်ပါတယ်။ အင်တာနက်ကို အသုံးပြုပြီး ကိုယ်ကျိုးရှာတာမျိုး၊ အလှူခံတာမျိုး လုံးလုံးမရှိပါဘူး။ လက်ရှိ ပရဟိတတွေလုပ်နေတယ်ဆိုတာကလည်း ဦးဇင်းနဲ့ ခင်မင်ရင်းနှီးသူ ဓမ္မမိတ်ဆွေတွေနဲ့စုပေါင်းပြီး အိပ်စိုက်လုပ်နေကြတာပါပဲ။

အင်တာနက်သုံးစွဲသူတွေ တစ်ခါသုံးရင် တရားတစ်ပုဒ်ဖတ်မိလည်း မနည်းဘူးဆိုတဲ့ စိတ်ထားလေးနဲ့ အင်တာနက်သုံးခြင်း ဖြစ်ပါတယ်။ နာမည်တွေ လျှိုဝှက်ထားတာလည်းမရှိပါဘူး။ ဒါကြောင့်မို့ ရဟန်းတော်များ အင်တာနက်သုံးသင့်/မသုံးသင့်ဆိုတဲ့အမြင်ကို ဓမ္မမိတ်ဆွေများ၏ မှတ်ချက်များက အဆုံးဖြတ်ပေးလိမ့်မည်ဟု မျှော်လင့်ရင်း....။
=================================================



အရှင်ပဏ္ဍိတ(ဒေါင်းဖြူ)
09.31564854